LYRIC / PARODDI / PARULLE / CANTI

Pè u zitellu in collu a mamma è chi si more
Quandu i cumpagnoli ghjocanu à l’amore
Si l’acellu feritu, ùn sà mancu perchè
A so ala hè di sangue è tombu u so gudè
Pè la sete è la fame è tutti l’ohimè
Vi salutu, o Mari.

Pè li ciucci minati è lu briacu tortu
Pè u sumere chi receve i calci in corpu
Pè u nucente ch’hà la so vita inghjuliata
Pè a zitella persa quand’omu l’hà spugliata
Pè u figliolu ch’hà la so mamma insultata
Vi salutu, o Mari.

Pè la vecchja sottu la soma ch’à suffertu
A chjama à Diu sordu in paese disertu
Pè u malaviatu ch’ùn ebbe amore umanu
Pè u pesu di a croce à lu spinu cristianu
Pè u cavallu mortu à l’entre di u veranu
Vi salutu, o Mari.

Pè li quattru orizonti chi inchjodanu lu mondu
Pè quelli chi la so sperenza piglia fondu
Pè quellu ch’un hà pedi è quellu ch’un hà mani
Pè lu malatu chi pensa à tutti li sani
Pè lu ghjustu accusatu è lampatu à li cani
Vi salutu, o Mari.

Pè la mamma chi sà chi u figliolu hè vivu
Pè l’acellu chi chjama u s’acellucciu à u nidu
Pè l’erba ch’hà la sete è chi piglia l’acquata
Pè u rimitu chi un sollu s’hà truvatu
Pè lu to basgiu persu, è pè l’amore datu
Vi salutu, o Mari.

F.Jammes
Canta u populu corsu


Accumudatu by

Cyril Gutierrez

SPARTE

Votre adresse de messagerie ne sera pas publiée. Les champs obligatoires sont indiqués avec *

Ce site utilise Akismet pour réduire les indésirables. En savoir plus sur comment les données de vos commentaires sont utilisées.