LYRIC / PARODDI / PARULLE / CANTI

Eiu sò la lingua corsa,
Ùn voddu micca mora,
Sò la lingua materna
Di li vosci antinati
Parchi à tempu d’oghji,
Vulemu tena fora ?
O corsu, senza mè,
Sareti sbattizati !

M’aveti ghjà spuddatu
Di li paroli antichi,
M’aveti infrustiritu
È m’aveti ingannatu
Di ciò ch’eiu sò stata,
Ferma pochi vistichi
Parch’aveti vargugna
Di tena u me parlatu …

Eiu sò la lingua corsa,
Di li vosci maiori
Chi hè stata aduprata
Frà i seculi sani
Quidda per di « o mà »,
Quidda per di « dulori »
Quidda chi hè stata sempri
In bocca di l’anziani …

Eiu sò la santa lingua
Chi dopu à u culombu
Ni chjamaia à l’aiutu
Par salvà u paesi
Sò quidda chi chiria
A polvara è u piombu
Pà stirpà Sarracini,
Grechi o Genovesi …

Sò a lingua di quelli
Chi oghje sò spariti
Chi ghjacemu in sta terra
Di dolu è di pientu
E voi, i so figlioli,
Firmate russuriti
S’è in giru à voi, in corsu,
Vi si canta un lamentu !

Sò la lingua materna
Di le vostre mammone
Chi cuntavanu fole
In giru à lu fucone
Chi cuntavanu gioie,
Chi cuntavanu affanni
In l’unicu parlà
Di tuttu lu rughjone …

Sò quella chi, luntanu,
Chjamava u rispettu,
Frà la ghjente amica,
È ancu più furestera
Sò quella chi sincera,
Sbuttava da u pettu
Di dui corsi spersi
In un fondu di galera …

S’è voi perdite à mè,
Perdite a vostra razza
Un s’ammintarà più,
Nè ceppu, ne casata,
Ne sarete in stu mondu
Una rubbaccia lazza
U corsu ùn serà più
Chè lingua tralasciata …

Eiu sò la lingua corsa
Ùn vogliu micca mora
Sò la lingua materna
Di li vosci antinati …


Accumudatu by

Stephane Gutierrez

SPARTE

Votre adresse de messagerie ne sera pas publiée. Les champs obligatoires sont indiqués avec *