LYRIC / PARODDI / PARULLE / CANTI
Bianca la nebbia, bianche e stelle,
Vèghjanu, mute sintinelle,
Nant’u reame di l’ altagne.
Bianchi li cori inghjuliati,
E mani di l’impriggiunati
Ch’hanu verità per cumpagna.
Rosse le fronde di Vaghjime,
Mantellu sangue nant’e cime
Ch’elle vòlenu attippà.
Rosse la lotta è la bandera
D’una càusa pura è vera
Chì ci parturiscerà libertà.
Verde di l’erba u tappettu
Chì vole accuncià cume un lettu
A la fronda chì casca pianu.
Verde l’ànime di sperenza
Chì aspèttanu cunniscenza
Di l’alba d’ un novu veranu.
Turchini lu celu è lu mare
Inghjinuchjati à l’altare
Di questu orisonte di sciume.
Turchina l’ora di a vittoria,
Quandu dumane chjamendu gloria
Ci purterà sin’à u lume.
Se l’Auropa quì s’ avvanza
Cù u so màzzulu di speranza,
L’avvene novu custruìmu,
Dentru e dòdici stelle d’oru
Tesseremu a testa di moru
Per ramintà ciò chè nò simu.
Ripigliu:
Esciute d’una stessa unione,
Storia, bandera è nazione
Di la so terra hanu i culori.
Nati d’una stessa natura,
Pòpulu, lingua è cultura
Di sta terra seranu i fiori
No comments yet