LYRIC / PARODDI / PARULLE / CANTI

A l’entre di lu to mondu, da lu tempu custuditu
Chì tuttu in lu circondu, pari pà sempri sculpitu

Pari pà sempri sculpitu, da stu ventu chì ti tocca
E chì mai ùn hè sparitu, à l’entre di la to bocca,

A l’entre di la to bocca, purtonu  di l’immensità
Sculpitu in quissa rocca, teatru di l’antichità

Ripigliu

Mistiriosa citadedda, bianca com’è la calcina
Sè l’ultima sintinedda, di pettu à la marina,
Di pettu à la marina, è lu mari prufondu,
Quandu l’acqua s’avvicina, à l’entre di lu to mondu

Teatru di l’antichità, pà tutti l’ispluratori,
Chì vulianu cunquistà u to elpali di valori

U to elpali di valori, divintatu un casteddu
Chì tutti li so signori t’ani missu l’aneddu,

T’ani missu l’aneddu pà fà di tè una regina
D’issu mondu cussì beddu chì strapiomba la marina

Ripigliu

Chì strapiomba la marina, sin’à Capu Pertusatu,
Fighjulendu ogni matina, l’orizonti à lu so latu,

L’orizonti à lu so latu, cù lu so riflessu giaddu,
Chì mai ùn s’hè scurdatu di Lavezzzi è di Cavaddu

Di Lavezzi è di Cavaddu, peruli di sta cullana,
Sò li maistosi scoddi di pettu à la sulana

Ripigliu

Ghjuvan Federiccu Terrazzoni / A.Marielli


Accumudatu by

Stephane Gutierrez

SPARTE

Votre adresse de messagerie ne sera pas publiée. Les champs obligatoires sont indiqués avec *

Ce site utilise Akismet pour réduire les indésirables. En savoir plus sur comment les données de vos commentaires sont utilisées.