LYRIC / PARODDI / PARULLE / CANTI

Vi vogliu cuntà fanduna
Di l’annu sissantrè
Quandi u ventu di sfurtuna
Si cansed’à u so parè,
E ancu in casa reale
Suminedi timpurale

Girat’avia Arabia
Circataghjendu l’aiutu,
Da alger’à Tunisia
Senza teme lu rifutu,
Sin n’hè vultatu in batellu
Samperu lu culinellu

S’era lasciat’à Vannina
In casa cù li figlioli,
Dui belli ghjuvanotti
Di famiglia li maglioli
Tutti sott’à a prutezzione
Di u sgio curat’Umbrone

Navighend’à ventu in poppa
E à imbastu trattatu,
Pensav’à rientre in casa
Da viaghju faticatu,
Quandu ghjunsi a bunfulata
Chi à moglia avia mancatu

L’avia fatta patrona
Partendu pè la Turchia,
Cunfinendu lu casale
Sicondu l’usu nustrale,
A donna di cumpagnia
Chi si n’era andanta via.

Dopu avè presu u partitu
Di u nimicu tant’uddiatu,
Vindut’avia lu tettu
Pè trè soldi di sacchettu,
E purtava lu zitellu
In Ghjenuva pè vascellu

Ma di sentesi ingannatu
O forse ancu curnutu,
E di vede si imbuffatu
Cum’è Turcu cu l’imbutu,
Avia capu à macinellu
E lu core à mulinellu.

A l’iniziu di la stizza
Turbat’era u so discorsu,
Un aghjustava parolla
Ughjulendu cum’è orsu,
Ghjastimendu lu dimoniu
Cun Cristu pè tistimoniu.

A l’ora di sbarcatura
S’era vistutu in culore,
Sempre bellu d’andatura
Piattendu lu so dulore,
Ma cù ochji fulminenti
Cum’è spirioni di sole.

Salutenduci sinceru,
Attarzatu hà l’auguri,
Po si n’hè andatu fieru,
In casa à piglia misuri,
Cù le mani tremulente
Pè curà lu tradimente.

Dapoi ùn l’aghju più vistu
Ma si dice in lu rughjone,
Ch’ellu c’hè statu carneghju
In dimora di u leone,
Cù la sciarpa in cuntinenza
Stranguledi pè sintenza.

O Madonn’accugliadora
Regina di Pradisu,
Ascultate a me prighera,
Cum’è sempre cun surrisu,
Allebiate a so disgrazia
Fate la pè carità,
Epè Corsica in attesa
Chi senza ell’ùn po campà.


Accumudatu by

Cyril Gutierrez

SPARTE

Votre adresse de messagerie ne sera pas publiée. Les champs obligatoires sont indiqués avec *