LYRIC / PARODDI / PARULLE / CANTI
Un ponu più sapè
I nomi si ste petre
Zuccate da a storia
Per dà capu à l’eternu.
Un ponu più sapè
Ste case à tinte tetre
Lumere di memoria
Cum’un focu d’inguernu.
Un ponu più sapè
Sti canti suminati
Per l’aghja cantarina
À l’asgiu di u ventu.
Un ponu più sapè
Di i mulini amati
A macina calina
Ch’incanta ogni mumentu.
Se nunda nun laghemu
Un lu lagherà nimu
Un dimu più « seremu »
Chi tandu più nun simu.
Un ponu più sapè
U dì di e funtane
E rime di i fiumi
È e dolce surgente.
Un ponu più sapè
E vie paisane
E note è i prufumi
Di a machja sumente
Un ponu più sapè
U ballu di a luna
I detti di u sole
È ciò ch’un celu conta.
Un ponu più sapè
Ciò ch’hè isula una Legende è dinù fole
Stu sognu ch’ùn tramonta.
Se nunda nun laghemu
Un lu lagherà nimu
Un dimu più « seremu »
Chi tandu più nun simu.
Un ponu più sapè
A lingua di l’acelli
I lumi di stagione
Eppò tanti culori.
Un ponu più sapè
I cari riturnelli
Puemi è canzone
È mazzuli di fiori.
Un ponu più sapè
L’amore di sta terra,
L’andate campagnole
I chjassi di l’anziani.
Un ponu più sapè
U passu cum’ellu era
È mez’a stradiola
Quell’oru trà e mani.
Se nunda nun laghemu
Un lu lagherà nimu
Un dimu più « seremu »
Chi tandu più nun simu.
No comments yet