LYRIC / PARODDI / PARULLE / CANTI
Oghje vi vogliu cuntà
Ciò chì u mio core vole di
U vogliu fà parlà
Per pudè lu adulci
Ellu pienghje è mi ramenta
Tutt’i martiri spariti
Sta luce mai spenta
Per st’omi oghje muti…
Tutti st’omi valenti
In cerca d’un ideale
Ch’un temianu l’arganti
Di a putenza culuniale …
Certi eranu sole cunniscenze
D’altri, fratelli o cumpagni
Ma uguale sò l’assenze
E ferite è i lagni…
Cù unepochi emu spartutu
Stonde fraterne, stonde scure
Quand’u disperu hè accadutu
Immense eranu e sciagure
Pian’pianinu u core mi sussura
Ch’in Serriera, In Carghjese,
in Borgu, in ogni pianura,
È in ogni paese
Oghje sempre, sò mille culombe
Chì fiuriscenu e tombe
Annacquandu ogni fiore
Cun lacrime d’amore…
Stà zittu lu mio core
Ci n’hè serebbe troppu à di
E malgradu u strappacore
Circhemu à rinvivì…
Sai, per rendeli onore
Sparghjimu per fà fiuri
Cun fede è cun fervore
Ciò chì c’hà d’adduni
E stà zittu lu mio core
Ci n’hè serebbe troppu à di
Malgradu u strappacore
Feremu rifiurì…!
No comments yet