Cambià u Mondu

S’e avissi a putenza
Adupraria tandu e forze
Per fà sparte l’abbundanza
E di a pianeta e risorze
Ghjuvendumi cà di l’arme
Per chi nimu morga di fame

S’e avissi a sapienza
A struzzione è u naturale
S’e era d’alta intilligenza
Di rinumata universale
Tandu faria chi a scenza
Possa curà ogni male

S’e avissi donu divinu
E i miràculi pudè fà
Cambiaria lu destinu
Di à chi nasce per strazià
Eppo esse induvinu
E ancu a disgrazia parà

S’e avissi lu cummandu
Pigliara e decisione
Per chi più mondu tandu
Si trovi in situazione
Di lascià more u puvarellu
Per tratichjà u riccone

Chi u riccone ùn si ne face
Quessa eiu aghju capitu
Mancu appena li dispiace
Mai ùn pisarà un ditu
Chi lu troppu techju si sà
Micca crede u famitu

S’e fussi lu più supranu
Truvaria le manere
Per fà u mondu più umanu
Senza muri nè fruntiere
Induve ci dariamu a manu
Libari senza galere

S’e fussi lu Criatore
Cambiara oghje a figura
Fendu di a tarra un fiore
Mezu à un nidu di virdura
Induve ghjustizia è amore
Sarianu a maio primura

S’e avissi u putere
Di pudè cambià u mondu
A faria incù piacere
Per ch’ellu girga più tondu
Per fà finisce le guerre
E dinù salvà u circondu

Accumudatu by

Cambià u Mondu