INFURMAZIONE / INFORMAZIONE
| Anniversariu : | 01/01/2015 (Age 9) |
Vol’esse un pinsà, una rifessione inquant’à sta terra agrupasturalina ricca di storia induv’è e nostre ràdiche ci s’intreccianu da una pieva à l’altra di a nostr’ìsula, da un rughjone à l’altru di u nostru populu.
Vole esse raprisintativu d’una mùsica è d’una scrittura induv’ella si cunface a tradizione cù a mudernità è chì adunisce cusì una leva nova. Hè una petra roza scarpillinata ghjornu filu ghjornu è cù l’evuluzione di a sucetà corsa, licata stretta cù u so populu. I so tema, di sucetà, d’attualità, sò di primura pà issu populu è sò porti cù una musica cù l’orìgine diverse da cuncoglie è tuccà à tutt’ognunu.
U gruppu « CELENTE» prupone, frà altru, un opus dedicatu à a so terra chì u so titulu hè “Àlitu d’Anima”, ci sò dinò temi d’abbartura à nant’à u mondu chì a Còrsica deve ancu lampà un ochjata ver di u fora da avanza in cunsunanza cun ellu ma senza perde a so sputichezza.
« Àlitu d’Ànima » hè issu filarellu rossu chì dice a tradizione à l’attu prisente ma chì guarda dinò voltu l’avvene, hè soffiu, hè “àlitu d’ànima” di sta sucetà corsa chì vole esse ella stessa senza infangassi in sta mundializazione scimàtica chì vole stirpà e particularità è e culture spùtiche.
Senza nè orgogliu, nè pretenzione nè baldanza, vole solu avanzà ver di l’avvene purtendu a so petrucella à l’operata cumuna di mantenimentu è di sparghjera di a nostra cultura, di core è d’ànima, da eri à oghje è pà dumane.
