LYRIC / PARODDI / PARULLE / CANTI
Eramu in un paisolu
Case viote è trafalate
Stu paese hè sempre in dolu
Tutti si ne sò andati
Pensa un zitellucciu
Tristu in le to chjappate.
A campana di a ghjesgia
Ùn pò più chjamà à nimu
Sott’i vechji tetti grisgi
Da la valle à le cime
Loch’è chjose abbandunate
Ancu e muvre sò scappate.
Pensa lu zitellu solu
Quand’è lu sole si ciotta
Ma in le fronde di l’olmu
Quand’ella fala la notte
Zitellucciu arechji tesu
Li s’hè parsu d’avè intesu.
Ellu hà intesu in li rami
Una voce chi dicia
Ella hà vistu in li rami
Una luce chi nascia
Stà mi à sente o zitellu,
E u chjamava fratellu.
A u pede di quell’olmu
Bagnatu di ragi d’oru
Zitellu di gioia colmu
Avia trovu un tesoru
Un fiore chi pianu sbuccia
In le mane di a fatuccia.
Dimmi tù zitellu d’oghje
U nome di stu tesoru
Dimmi tù zitellu d’oghje
Ciò ch’ell’era tuttu st’oru
Chi hè fughjitu lu dolu
Rinvivitu u paisolu.
Si chjamava stu tesoru
Lingua nostra è era d’oru.
M. Frassati \ G.C. Acquaviva
A Filetta
No comments yet