LYRIC / PARODDI / PARULLE / CANTI
U caldamonu oghji ci pichja à l’urizonti
U soli infiaratu ghjoca incù a so fonti
S’asciuva lu sudori à nantu à ugni fronti
Astutu sarà quiddu chì si busca un currenti
À nantu à l’arghja oghji attraghjini l’aienti
S’approntani pà veda i dui cumbattenti
Pesa, pesa, pesa dinò à nantu à sta tarra calda
Forza, curaghju è ingeniu in sta lotta auturitaria
Pà avè a suttumissioni o à fà cascà l’avvirsariu
I braccia sò falati a ghjustra hè principiata
Sta lotta omu à omu hè quasgi impicciata
Hè tandu a prima passa di a noscia vincighjata
À a prima bugata u publicu s’ascitta
Attenti à ugni nodu attenti à ugni anchitta
Ma a parsona fiera avali hè sempri ritta
Pesa, pesa, pesa dinò à nantu à sta tarra calda
Forza, curaghju è ingeniu in sta lotta auturitaria
Pà avè a suttumissioni o à fà cascà l’avvirsariu
À quiddu chì rifiata a pula ùn hà risistutu
I ghjambi sdurduliti da l’omu furzutu
Ma ugnunu hè d’accunsentu iddu hà bè cumbattutu
U caldamonu oghji risana lu dulori
Di i dui amicacci ch’ani avutu u valori
À a prossima battaglia incù u stessu fervori
Svegliu d’Isula
No comments yet