LYRIC / PARODDI / PARULLE / CANTI
Sei giuvanotti asgiati
Cù una passione tamanta
Per i canti indiati
A leva di u settanta
À issa terra arradicati
Guasi cum’è arba santa.
Sè vo sete d’accunsentu
Secondu a tradizione
Hè venutu lu mumentu
Di fà e presentazione
Attenti à e piulate
È i colpi di bastone.
U primu hè capirasciatu
Quant’è sarre di Niolu
U purtevule appiccatu
È a chitarra à u colu
Longu longu sfilanciatu
Cum’è un palu di fasgiolu.
Minguli in quantità
Note ne ghjoca à miliò
U secondu hè verità
Pussede l’arte maiò
Cugnome s’ellu ùn nè hà
U chjamaremu « Django ».
In fatti d’animazione
U terzu si ferma mutu
L’accade à l’occasione
D’ùn esse micca vinutu
Mandendu per spiegazione
Un chjavellu ribattutu.
R : Ghjè avà ch’à noi tocca
Semu in cerca di talentu
Basta ch’omu apri la bocca
Diventa un veru
Scumpientu
Eccuti a filastrocca
Di a squadra Voce Ventu.
Incù a so bella cesta
Pelle mora i tratti fini
Ne face girà a testa
À e zitelle aiaccine
Ma li piace ancu à fà festa
È pigliassi e briachine.
L’altru chjappa li terzetti
Spezzanu li tempurali
Schiattanu toni è saetti
È fughjanu l’animali
I culombi, li falchetti
A volpe incù li cignali.
Forse u più cunnisciutu
Di scurdammine ùn possu
Dumanderete l’aiutu
Quand’ellu vi casca addossu
S’ellu sorte à lu prisuttu
Ùn vi lascia mancu l’ossu.
R : Ghjè avà ch’à noi tocca
Semu in cerca di talentu
Basta ch’omu apri la bocca
Diventa un veru
Scumpientu
Eccuti a filastrocca
Di a squadra Voce Ventu.
A friscura sittembrina
Ammatta i suleoni
Hè finita l’estatina
È compie sò e canzone
Accozzanu in cantina
Centunai di milioni.
D’avè vistu mi ramentu
Un magnificu tesoru
U si sparte Voce Ventu
U fruttu di issu lavoru
Nutendu mezu à l’argentu
Cù e stacche piene d’oru.
Spergu ùn ci serà ferita
Postu chì nimu si lagna
Issa canzona hè finita
È lu mio estru muntagna
Forse l’avete capita…
Ghjera solu una macagna.
R :Ghjè avà ch’à noi tocca
Semu in cerca di talentu
Basta ch’omu apri la bocca
Diventaunveru
Scumpientu
Eccuti a filastrocca
Di a squadra Voce Ventu.
Eccuti a filastrocca
Di a squadra Voce Ventu.
Eccuti a filastrocca
Di a squadra Voce Ventu.
No comments yet