A ghjastema

Com’edda hè buciarda la ghjenti
Dici ch’e’ so’ un maldicenti
Ch’edda mi piaci à ghjastimà
Senza nissun unestità

A tutti issi rompicugliona
Li didicheghju issa canzona
In trè tratti l’aghju cumposta
Da vindicammi à bedda posta

U me vicinu chì hè cusì stragnu
Cusì bruttu chì pari un ragnu
Ch’eddu s’annodi u so chjirchjeddu
E ch’eddu li boddi u ciarbeddu

A me cummari issa cacarona
Ch’è li s’aggrancani l’armona
Ch’è li falghi a piscia ghjilata
E ch’edda firmessi agrunchjata

Ripigliu
Quant’è tù se’ maldicenti
Peghju di tè ùn ci n’hè
U me chjucu sighi attenti
Ch’edda ùn falghi in coddu à tè

U me cucinu issu ciamburlinu
Chì ùn vali mancu un quattrinu
Ch’eddu piccia in fiari à l’infernu
E po andassini à caternu

U me ghjènnaru issu mucciconu
Issu muritoghju issu latronu
Ch’eddu crepi com’a fasgiola
E firmassi nant’à una tola

Quant’è tù se’ maldicenti
Peghju di tè ùn ci n’hè
U me chjucu sighi attenti
Ch’edda ùn falghi in coddu à tè

A me nora issa baschirona
Issa cagastizza issa caprona
Ch’edda si smittessi i canteghja
E ghjunghji à l’ultima curreghja

A me moglia issa sbancalata
Issa zecca niedda spugliaccata
Ch’eddu li falghi addossu u tonu
E lampalla in un carabonu

Quant’è tù se’ maldicenti
Peghju di tè ùn ci n’hè
U me chjucu sighi attenti
Ch’edda ùn falghi in coddu à tè

In quant’à mè quandu la sorti
Mi farà infattà la morti
Li diciaraghju : robba da forca
Vatini puru in zuliforca

Nanzi di mora à cripatura
O muddizzò stà pur sicura
Tengu par tè in emma ed emma
A me ultimona ghjastema

Quant’è tù se’ maldicenti
Peghju di tè ùn ci n’hè
U me chjucu sighi attenti
Ch’edda ùn falghi in coddu à tè

A t’emu ditta à cori strintu
A t’emu ditta ancu bè
A ghjastema lu me tintu
Hè pur’ falata in coddu à tè.

Paulu Desanti / Marcu Valentini

Accumudatu by

A ghjastema