LYRIC / PARODDI / PARULLE / CANTI

Pigliu una penna eppo à scrive mi mettu
In puesia à dipigne stu sugettu
D’ùn esse più furtunatu di rime quantu rigrettu
Pè spiicà quella pustura di a figlia ch’era in lettu

Collu e scale è pichju à l’usciu chjosu
S’affaccò tandu un sguardu luminosu
Dicendu « cosa circate, amicu cusì pietosu ? »
« Cercu à vede a malata » subitamente risposu.

Mi disse allora « hè spressu chì vivnite,
Cù pena in dolu à lu male currite
Soca voi, a malata, di moltu à cunniscite.
Aspittate ch’o a parli pè dì li qual’è vo site. »

Entrì in la stanza è fece sta riclama :
« Ci si hè un tale chì di vede ti brama
S’è tù li voli riceve hè prontu pè la to chjama »
Tandu da par mè sintiu « dite li ch’ell’entri o Mamma »

S’apre in un colpu di a stanza a sarratura
Entru è salutu cun tutta a primura
È poi stesu la manu à l’angelica figura
M’apparì guasi lu pientu videndu a so statura

Cusì m’intesu allaccià lu mio core
Videndu soffre quellu limpidu fiore
U m’avaria chjappu eiu piuttostu lu so dulore
Ma quessa ùn pudia fà la di crede mi u Signore.

Di tantu in tantu lintava un tristu lagnu
Chì suminava in mè vilenu pagnu
O dipoi stu ristorbu ùn ne riposu è più n’ùn magnu

Era inundata di larme la so stanza
Quand’è li disse d’ùn perde la spiranza
Ch’è li purghju la manu priparendu la partanza
Ma sempre prichendu à Diu ch’ellu li dessi bona scianza

A mi lacaiu viva pè u mumentu
Poi partiu cù lu core scuntentu
Quelli suspiri lagnosi divintonu per mè spaventu
Durante lu mio caminu aghju vuceratu è pientu.

Ghjuvan Pasquinu Acquaviva
A Filetta


Accumudatu by

Cyril Gutierrez

SPARTE

Votre adresse de messagerie ne sera pas publiée. Les champs obligatoires sont indiqués avec *

Ce site utilise Akismet pour réduire les indésirables. En savoir plus sur comment les données de vos commentaires sont utilisées.