LYRIC / PARODDI / PARULLE / CANTI

Maladettu sia quellu chi vene in li mio lochi
Per lu piacè di tumbà ci quandu simu digià pochi
Cù li cappii è li fucili è l’estate cù li fochi.

Ditemi chi male facciu, sterpe in grate è insignurite
Quandu vo a caccià mi la fame cù le castagne impassite
Ch’è più nimu ùn vole coglie, troppu techje ch’è vo site.

Almenu chi tanta zerga piatti un estru più fanaticu
Di vulè stirpà li mei per pigliassi lu terraticu
E truvendu cum’è scusa ch’aghju un razzinu salvaticu.

I razzoni ùn si toccanu, chi ghjè robba guasi mansa
Si ponu tene i puchjini, ingrassati à tutta mansa,
Senza libertà nè stimulu, bastà ch’ella sia piena la panza.

Ma chi diu mi ne liberi, di issu destinu ùn ne vogliu,
A pensà mi ingabbiatu, mi face tantu endogliu,
Megliu hè fraca è more, cù la curagiu di l’orgogliu.

Quantu volti n’aghju vistu, da lu fondu à la mio tana
Chi ghjunghjenu cum’è famiti, bocca aperta, manu prufana
A impastrà, rompe è purtà si in casa soia a machja sana.

Ch’ella sia cum’ella sia, per ruspà o per fà mi guerra
Tutti iss’altri civilizati ch’investiscenu ancu la serra
Un ghjornu o l’altru, mortu eiu, si rumaranu la mio terra.


Accumudatu by

Stephane Gutierrez

SPARTE

Votre adresse de messagerie ne sera pas publiée. Les champs obligatoires sont indiqués avec *

Ce site utilise Akismet pour réduire les indésirables. En savoir plus sur comment les données de vos commentaires sont utilisées.