Grande magu di l’alte sfere
Fammi scopre le to arcane,
Vers’à quelle arie bianche e nere,
Inségnami e parulle strane
D’u libru apertu di u celu,
D’un corpu di u to bastunellu.

Sò cullatu in lu Caritellu,
Pegasu ci aghju affunatu,
Per fammi visità u celu,
E tandu à galoppu serratu,
Viaghju cume à l’appasponi
Mezu à mille cunstellazioni.

D’isse fiare misteriose,
Ochji d’una fata zitella,
Di Nanne Bianche in Nevulose,
Riscalderaghju la mio bella
Cun tanti soli sfiammicanti,
Per falli cullana à diamanti.

Aghju cavalcatu u Dragone
Versu e fruntiere di l’avvene,
Vi salutu Vega, Orione,
E Cassiuppea tante serene,
E Lira, di a so melodia,
M’hà cuntatu a so nostalgia.

Vi salutu celeste fiare
D’e Ghjallinelle accumpulate,
Sapete quantu vi tengu care,
Mezu a lu biotu sfrombulate,
E ogni notte, petre d’oru,
Torna di voi m’innamoru.

Altri canti cu A Lingua D’Inde Noi ##

• A Lingua D’Inde Noi
• Camperemu
• Canteraghju
• Donna
• Hè A Sola
• Hè Cascatu U Muru
• Ma Si Vivu
• Paglia Orba
• Resistenza
• Una Fata