LYRIC / PARODDI / PARULLE / CANTI
Da e serre d’i monti à i piani,
Da sopr’i fiori aperti di Maghju,
Da sopr’à tutti i fiumi è tutti l’oceani,
Canteraghju, canteraghju.
Per a terra chì aspetta e grane,
Per i culori di u rosulaghju,
Per e cime nebbiose chì fighjanu dumane,
Canteraghju, canteraghju.
Ripigliu:
Canteraghju a vita cume un fiume,
E nantu di lu sole ogni raghju,
Vogliu scrive ‘ssu nome in lèttere di lume,
Canteraghju, canteraghju.
Per l’acellu chì scopre e stelle,
Per a neve chì vola in Ferraghju,
Cun tutti i versi d’i madricali è paghjelle,
Canteraghju, canteraghju.
Per a fratellanza cume un fiore,
Per u pastore è lu so pagliaghju,
Per tumbà l’oddiu è per parturisce l’amore,
Canteraghju, canteraghju.
Per un paese ch’ùn vole more,
Duve lu sole hè sempre di Ghjennaghju,
Per un’altra libertà, per un’altra albore,
Canteraghju, canteraghju.
Per ‘ssa vita, ‘ssi cori, ‘sse vene,
Per una cultura è un linguaghju,
Per un populu chì torna crede à l’avvene,
Canteraghju, canteraghju.
No comments yet