Se tù sapessi li viaghjoni
Duve ci simu ritrovu inseme,
A longu d’i sogni i rughjoni,
Ver di quell’albe strane è sceme.
Ti vogliu esse ‘ssi luciori
Ch’i Rè Maghi hanu seguitati,
Tù, ochji d’arcu di culori,
Li mio tempurali hai calmati.

Ripigliu:
Donna, sì donna,
E sì tù l’uttava meraviglia,
Per tè la mio voce risona
Di mille màzzuli d’armunia.
Donna, sì donna,
A l’altare di la mio pazzia,
E lu to risu quandu ellu tonna
Hè lu più bellu rigalu chì sia.

Ti vogliu sparte le mio lotte
Contru à quell’indiferente stonde,
Ti vogliu annaquà le mio notte
Di la to chjoma à spisce bionde.
Eiu sò l’errante di l’alba
In cerca di l’ùltime ore,
Ti vogliu curiola è vitalba
Per imbalsamà lu mio core.

Per rompe u cotru di l’assenza
Eiu mi so inventatu un mondu
Mezu dulcezza, mezu viulenza,
A u filu di lu to corpu tondu.
Eiu vogliu per tè scrive quì,
Tù chì sì di lu m’inguernu a fiara,
Eiu ch’ùn aghju mai saputu dì
Sin’à chì puntu eiu ti tengu cara…

Altri canti cu A Lingua D’Inde Noi ##

• A Lingua D’Inde Noi
• Camperemu
• Canteraghju
• Fulena Di Stelle
• Hè A Sola
• Hè Cascatu U Muru
• Ma Si Vivu
• Paglia Orba
• Resistenza
• Una Fata