LYRIC / PARODDI / PARULLE / CANTI

Trà a Tana è i Ghjacumoni, in issi lochi cusì amati
Vecu tamantu circondu, quiddu di i me antinati
Magnificu è mistiriosu à mez’à a piaghja è l’altura
Ogni volta ch’e ci ghjungu m’arreca paci è forza sigura

Rivecu una vela bianca, si ni fala da i steddi
In un silenziu grevu di machja abbisistita
Carriendu tanta spera in i vosci ochji ziteddi
Semu in tempu di sighera à l’appiattu di a rivista

Da un cantonu vecu a Sardegna, socu quì è in altrò
À ‘ssa sorti à malavia, eti rispostu innò
M’addurmentu è sunnieghju in a bocca di Siò

Di cascà vi ni in vinochju ùn erati tant’avvezzi
Nè vi dumaia a zappa nè vi frustaia a fedi
È puri quidda notti versu u celi eti prigatu
Irunia di u signori chì lampa armi com’è pani

Ci sarà una bandera da pudè fà vi l’unori ?
Par avè ni dui o trè o centumila culori
Dopu un’ opara cumpagna, quidda di a risistenza
Si scatena a mimoria ma si risenti l’assenza

S’hè ripituta a storia trà i torti è i raghjò
Hà triunfatu a guerra, fussi l’ultima o fiddò
Una cansa di mimoria quì in a bocca di Siò

Ma sta seti di libartà, ind’hè missa oghji o cumpà
U nimicu ùn hà fucili ma calculatrici in mani
Qual’ sarà l’omu o u fattu chì ci pudarà scità
Chì a lotta ùn hè finita ferma sempri tantu à fà

D’Africa cusì luntana s’era mossu un avviò
S’avvicinaia a vittoria, ci ghjapriani u stradò
Hè accaduta una volta, forsa vultarà dinò
Qualch’aienti rucchisgiani in a bocca di Siò

Svegliu d’Isula


Accumudatu by

Cyril Gutierrez

SPARTE

Votre adresse de messagerie ne sera pas publiée. Les champs obligatoires sont indiqués avec *

Ce site utilise Akismet pour réduire les indésirables. En savoir plus sur comment les données de vos commentaires sont utilisées.