LYRIC / PARODDI / PARULLE / CANTI
In core di i mei ci dorme l’alegria
Puru quandu a vita inciampa li so passi
Ci dorme tantu amore è tanta puesia
Ancu s’elli sò zitti o s’elli stanu bassi.
In bocca di i mei ci stanu mille fole
Da cuntammi i tempi di tutte le sumiglie
Chi tessenu a leia nantu à un filu d’amore
Mentre a vita corre è strappa ogni briglia.
In manu di i mei hè scritta a spartera
In lettare sulcate da e cugliere andate
Hè dettu u travagliu è po la straziera
Per fà cresce più belle e so nove biate.
In l’ochji di i mei ci vecu tante frante
Tanti amori partuti in l’eterne credenze
Una manera d’esse una fede tamanta
Tuttu ciò chi hè amore è chi pare viulenza.
In casa di i mei ci canta una lingua
Vechja quant’è a terra induv’è elli sò nati
E vulia d’amore scrive’sse duie rime Bis
Dilli quantu sò fieru d’avelli à lu mio latu.
No comments yet