LYRIC / PARODDI / PARULLE / CANTI
Per ‘ssi lochi di fole è di misteri,
Se tù sai guardà
U Populu di a furesta
Ti puderà guidà,
À l’ombra di l’Alburu d’Oru,
Compie le spassighjate,
Dorme quì un lavu chì si chjama
U Spechju à e Fate.
Lasci i to passi girandulà
Nant’à la petra malba,
Cùn mè veni à coglie l’acquata
Quand’ella sbuccia l’alba ;
Quì si spusonu storia è fola,
Tradizione intracciate
Scritte in lettere di sciuma annant’
A u Spechju à e Fate.
Ti portu à u Ponte d’i Sicreti
Per coglie qualchi fiore,
Quallà Lancelot è Ghenievra
Svilonu lu s’amore.
E grinze d’u tempu nant’i nostri
Visi dissegnate
Spariscenu quand’eiu ti guardu
In lu Spechju à e Fate.
Quandu seranu spente e sperenze,
E li mio sonnii domi,
Chì stancu seraghju di tutt’
E pazzie di l’omi,
S’ella ferma in la mio ghitarra
Sette note piattate,
Mi n’anderaghju à fighjà lu mondu
In lu Spechju à e Fate.
No comments yet