LYRIC / PARODDI / PARULLE / CANTI
Tù ch’hè ghjuntu quì ascolta a mio rima
Conta a storia d’u monte quallà
Un capu di donna incù a so scuffia in cima
Omu a chjama “a Spusata” impitrata tempi fa
Era giuvanotta, povara cun mamma
Cun poca robba per campà
Ma cusì bella chì un sgiò n’ebbe bramma
La dumandò é spusata si vulia appruntà
“N’aghju fattu centu viaghji luntani
Per ‘sse cuntrate da mare indà
Oghje sò compii li pienti è l’affanni
Ch’aghju trovu infine a donna ch’eiu puderia amà.”
“Sò scalza è spugliata, a sorte hè crudela
Ma lu m’amore prezzu ùn hà
Chì lu mio core di tinta pasturella
Vale tuttu l’oru chì eiu n’ùn vi possu dà.”
Quandu vinse l’ora di passà la porta
Vidì nant’u stradò quallà
Una cavalcata ghjunta à falli scorta
Cume s’ella fussi puru signora ad accumpagnà.
Tandu a giuvanotta in cerca di dota
Si messe à tuttu impacchettà
Lasciò a mamma in la casa ormai biota
Pienghjendu è lagnendusi di tant’infamità.
Povera vichjetta sola è disgraziata
Senza più nunda per campà
Mancu un addiu, è manc’una abbracciata
Figliola cusì ingrata senzu un palmu di pietà
Scema di dulore, di pienti abbagliata
A mamma si messe à ghjastemà
“Cor’ di petra, in petra fussi scambiata !”
Eccu a fola di a Spusata impitrata tempi fa.
No comments yet