LYRIC / PARODDI / PARULLE / CANTI

A notte pianu pianu, sparghje lu so mantellu
Per sti boschi spugliati, tracarchi di sognu
Spentu l’ultimu fiatu, si sventa la cucagna,
In fondu di lu celu, spunta a prima stella.

Per sti bughjali nudi, chì u freddu ha sicatu
Ùn si sente un fiatu, u silenziu nasconde,
E u frombu di u fiume, chì fughj’à mezz’e sponde,
Ribomba per i chjassi chì a brina ha cutratu.

Per sti paesi persi, arrimbati à l’eternu
U tempu s’hè firmatu, lascendu tuttu apertu
Ste case fallate, sti carrughji diserti
Fermanu testimoni, soli nant’un quadernu.

Sè tempurale soffia, certe volte si sente
Cullendu per i chjassi, u passu di u pastore,
U sò spiritu chì corre, trascina u so dulore,
S’anima ferita, si sgassa ind’è mente.

Certi ghjorni si sente, purtati da li venti
U pientu di a terra, chì mughja u so lamentu,
A so chjama si sparghje è corre nanta l’onda
Per fà cresce in le mente, a sperenza di u mondu.

A l’aggrotu d’un scogliu, hè natu un fiore biancu
U so lume risplende, si span’in la natura,
E a brina chi sguile, cun fede annacquerà
Sumenta in lu mondu, per sparghje LIBERTÀ …


Accumudatu by

Stephane Gutierrez

SPARTE

Votre adresse de messagerie ne sera pas publiée. Les champs obligatoires sont indiqués avec *

Ce site utilise Akismet pour réduire les indésirables. En savoir plus sur comment les données de vos commentaires sont utilisées.