LYRIC / PARODDI / PARULLE / CANTI

Aghju vistu un istati piccia focu la tassinca
S’innuzavanu tant’arburi stirpati come rimigna
Sopr’a tutti quelli costi, hè sparita ancu la vigna.

In faccia di stu lucali s’infiarava « l’Alta Rocca »
Curria fiara di u mali nant’i tetti di casali
Sott’un fumu infernali stesi eranu l’animali.

Un saraghju mai quali tu sè
Gattivu sughjettu senza faccia
Chi strughji pianu la nostra machja
Senza misurà ciò chi tu faci
Ciò chi tu faci.

Si sò tesi a fiumicelli sott’a cenera mischina
Ancu l’antica mucchjetta hè riduta in pulvina
Fughjenu spessu l’acellu u circondu in ruina.

Sott’u pesu di u calori a muraglia s’hè sfragliata
I fraschi portanu u dolu di a terra disguastata
Piegni lu vechju cantonu a la testa musginata.

Pò esse fieru di i to misfatti
Tutt’i me lochi sò sfigurati
Un ci hè ch’un tribunali divinu
Chi pò ghjudicà li to picati
Li to picati

Vuleriu chi un ghjornu chjappu di altu rimorsu
Sii prontu a rinica mancanzi è strade torte
Lascia campà la natura libera di la so sorte
Lascia campà la natura libera di la so morti.


Accumudatu by

Stephane Gutierrez

SPARTE

Votre adresse de messagerie ne sera pas publiée. Les champs obligatoires sont indiqués avec *

Ce site utilise Akismet pour réduire les indésirables. En savoir plus sur comment les données de vos commentaires sont utilisées.