LYRIC / PARODDI / PARULLE / CANTI

Indentr’à l’orbi secreti d’u nostru vechju librone
E più belle riturnelle sò di calambra nustrale
Ad ogni pagina scritta ad ogni pagina bianca
Ad ogni fiura sbucciata ad ogni canzona nata
M’assumigliu m’assumigliu.

À l’acqua di a surgente chi imbianca a spiscina
È porghje a rinfriscata sin’à e nuvale piane
À u lampà di a vista ver di u mare luntanu
Da a petra a più alta di e cime isulane
M’assumigliu m’assumigliu.

À tutte ste strade nove chi allarganu u passu
À tutte ste terre mosse da u sperà in l’umanu
À quest’ancure lampate in e marine d’argentu
Quandu soffia è minaccia u ventu di e straziere
M’assumigliu m’assumigliu.

À lu criaturu fiore natu in cor di sulleoni
Chi prumena a so crina un primu ghjornu di scola
À’sa lingua ch’ellu scopre à e labre di babbone
À’sa lingua chi ghjè nostra è chi face chè no simu
M’assumigliu m’assumigliu.

À cos’ellu si rispira eppò cos’ellu si mughja
À sta voglia ch’o vi cantu è cos’è vo mi rendite
À tutte ste stonde vere chi inventanu a vita
È simplicemente a vita di i nostri lochi a vita
M’assumigliu m’assumigliu.

Eric Mattei


Accumudatu by

Cyril Gutierrez

SPARTE

Votre adresse de messagerie ne sera pas publiée. Les champs obligatoires sont indiqués avec *

Ce site utilise Akismet pour réduire les indésirables. En savoir plus sur comment les données de vos commentaires sont utilisées.