LYRIC / PARODDI / PARULLE / CANTI
Cumu sapè induve andà quandu ùn si sà più da induve si vene.
I passi di l’anziani anu sulcatu chjasi cusi sicuri.
E so mani anu alzatu paesi cusi vivi. E so voci anu cantatu parulle cusi sincere. A storia cum’ella hè, si dace è si transmette tal’una fiara putente ma attempu fràgile. E tandun cum’è l’hà dettu Victor Hugo… Quandu more l’ignurenza, nasce a libertà.
U signozzu d’una tarra, chì sà arburà i scetri
Persu avìa à so zarra, frà li chjassi li più tetri
Da sbusginà una fiara.
È cusì,
Una prutesta nascìa, frà stu duttrina suciale
Pè suminà à sulìa, una identità reale
Chì s’accertava fundìa.
Tandu l’esse fù ragione, pè pruclamà è sussiste
L’arbitraria decisione, d’una cagione d’esiste.
È à cuscenze rabbiose, svulteremu l’inghjustizia
Di ste preputenza altose, à l’infama ingurdizia
Incù l’ànime bramose, da caccià l’inimicizia.
Quì ogni ventu s’hè destu, à u passu d’un dumane
È u focu manifestu, colmu à fiàccule suvrane
Dete un chjarore celestu.
È cusì,
À l’innasta illudente, d’una forza chjasimata
Una stella più ardente, ci sarà sparamundata
Pè zirlà d’altre surgente.
Oghje l’avvene cuncede, l’armunia d’un rinnovu
Da dissetà è spruvede, u sensu d’ogni riprovu.
È à cuscenze accese, volta torna a maestrìa
Da scioglie ste maniprese, ritruvendu à so vìa
Pè cuncreà stu paese, à l’alta demucrazia.
Da scioglie ste maniprese, ritruvendu à so vìa
Pè cuncreà stu paese, à l’alta demucrazia.
È cusì sarà.
Ceccè Angeleri / simon’Paulu Ferrandi
No comments yet