LYRIC / PARODDI / PARULLE / CANTI

Stasera a mio ghitara
Fromba sottu à u balcone,
Spartatevi prestu o cara
À sente e mio canzone.

Sì per grazia v’affaccate
L’anima tutta hè rapita
Ma rinchjusa s’è vo state
Si ne strughje a mio vita.

Cum’è luna è stelle in celu
Splende a vostra parsona,
S’è vo calate u velu
L’universu s’abbughjona.

Trà i fiori di u pratu
S’è vo passate ligera
Nu u chjosu furtunatu
Affacca a primavera.

Stasera a mio ghitara
Fromba sottu à u balcone,
Spartatevi prestu o cara
À sente e mio canzone.

Cum’è un chjucu trà e dite
Tene un acellu incabbiatu
In la manu voi tinite
Prigiuneru u mio fiatu.

Site a Madunnella
Ritta in cima di l’altare,
U mio core à a gradella
Brusgia incensu ad alte fiare.

O bianca cum’è a neve
O dolce cum’è u mele,
Eterne e stonde breve
Fate à l’amicu fidele

Stasera a mio ghitara
Fromba sottu à u balcone,
Spartatevi prestu o cara
À sente e mio canzone.

Sì a sorte ci sipara
Venganu l’ore supreme,
A partanza sarà cara
S’è no ci n’andemu inseme.

D. A. S. Versini / Michel Forte


Accumudatu by

Cyril Gutierrez

SPARTE

Votre adresse de messagerie ne sera pas publiée. Les champs obligatoires sont indiqués avec *