LYRIC / PARODDI / PARULLE / CANTI
I so capelli di ventu
Lucenu più ch’è lu sole
In lu mio paese notte
In lu mio lettu di fole
Lu mio pratu inveranitu Bis
Da li so ochji fiuritu.
Ella hè di luce dolce
Curbe fatte pè carezze
Quandu songu à le so forme
Musica di tennerezza
Sentu chi l’aria ne trema Bis
La mio pella torna scema.
La vogliu veste di basgi
Più caldi ch’ogni calore
Dendu u focu di u mio corpu
Cum’è un dolce liquore
Da tene in le nostre strinte Bis
D’ogni brama lu savore.
E candelle chi sò falate
Da lu celu di veranu
Longa quant’è lu mi amore
Li ne vogliu fà cullana
Da nùn pudè cuntà l’ore Bis
Da nùn pudè cuntà l’anni.
Ma s’è u tempu cambia versu
A la forca di li venti
In lu mio paese notte
Lu mio lett’à core spentu
Sterà cum’è una lumera Bis
Lu so sguardu d’accunsentu.
No comments yet