LYRIC / PARODDI / PARULLE / CANTI
Sunnieghju arrittu di capu ind’è e stelle
Incù le bracce sparte è l’ochji à l’orizonte
I paese landani è le terre ribelle
Mi sò palazzi d’oru è di mele ogni fonte.
Ci vec’una lumera ch’accende à lu me core
I chjassi ch’oramai anderan’à l’amore
L’amore di ognunu per quantu ch’omu vole
Abbraccicà li spazii è sparte lu sudore.
L’azuru frisgiuleghja è lu vent’hè legeru
Ch’hà ripostu in rigalu di bazz’una candella
U sol’abbagliuleghja à l’altu di u celu
Da struge lu penseru di ogni citadella.
U sognu di li mei lu mi portu in pettu
Ci vec’una bandiera da tante mane alzata
E tandu eo cantu in segnu di rispettu
Per ogni passu fattu nant’à la longa strada.
Chi ogn’omu chi canta hè un omu chi stridda
E la so voce immensa s’accoglie à la fiumara
Di la grand’armunia è di la voce unita
Chi ribomba in celu u ricuccu di a terra.
A strada ùn hè finita è lu sognu ùn hè mortu
D’intign’e nostre brame ind’è l’universale
Serà nostru lu mare è di tutti lu portu
Duve nascenu digià e spere di dumane.
E simu nati tutti pè di è pè cantà
Chi sunniem’arritti di capu ind’è e stelle
I pedi nanta u scogliu di chi seguiterà
I pedi nanta u scogliu di chi seguiterà
Nant’a terra di Corsica.
No comments yet