Ottobre sente e castagne
In paese fumicosu
Quand’u celu nebbiacosu
Fala nant’à le muntagne
Pare tutt’avvene chjosu
È finite le cuccagne.

Pare tutt’avvene chjosu
È finite le cuccagne.

Dicembre sente l’aranciu
Chì fiurisce per sse piaghje
Ma quandi lu ventu traghje
Piglia inguernu lu sbilanciu
Tempu d’acque è di nivaghje
Affannosu è pocu danciu.

Tempu d’acque è di nivaghje
Affannosu è pocu danciu.

Maghju sente la ghjinestra
Chì sbuccia per lu pughjale
Inzeppisce fiuminale
Verdicheghja la campestra
L’acelli spàrghjenu l’ale
Si spalanca la finestra.

L’acelli spàrghjenu l’ale
Si spalanca la finestra.

Aostu sente a filetta
Calpighjata à merendella
A notte s’empie di stelle
Di dulcezza benedetta
In core di le zitelle
Ci hè un fiore chì l’aspetta.

In core di le zitelle
Ci hè un fiore chì l’aspetta.

Chì senteranu li mesi
Di la pròssima stagione
Duve pianterà viaghjone
Cù le so sperenze appese
È basteranu e canzone
Per guarì tutte l’offese?

È basteranu e canzone
Per guarì tutte l’offese?

Altri canti cu Chjamu A Puesia ##