Voce ribella

Chì la mio voce ribella 
Sia chjara è putente
Ch’ella andessi à u più luntanu
Tal’un fiumone chì corre

Purtendu di Cursichella
Un accesu in ogni mente
Cum’è un fiore à lu veranu 
Sparghjendu un muscu d’amore

Chjodi l’ochji o prigiuneru 
È ascolta stà canzona
Ùn appia spiritu neru
U cornu sempre risona

Chì stu cantu di sperenza
Di sole porti un spirione
À ‘ssi Corsi imprigiunati
In paese furesteru

Fendu più dolce l’assenza 
Ogni ghjornu ogni stagione 
È chì li pugni liati
Sianu sciolti daveru

Chjodi l’ochji o prigiuneru 
È ascolta stà canzona
Ùn appia spiritu neru
U cornu sempre risona

Chì lu soffiu di a mio voce
Scambii l’aria in sfurianata
Sradichendu i purtelloni
Di ‘sse stanze bughjicose

 È chì u ribombu feroce
Di ‘ssa lingua assuffucata 
Fessi cascà muraglioni
Scarcerendu ghjuste cause

Chjodi l’ochji o prigiuneru 
È ascolta stà canzona
Ùn appia spiritu neru
U cornu sempre risona