Visioni care

Ancu s’à ùn videraghju più
La mio terra prima di more,
A mio patria a mi portu in core
E l’aghju sempre à tù per tù

Vegu u so celu gonfiu è tesu
Cum’è un preziosu ballacchinu
Sopr’à i paesi lu marinu
L’empie tuttu è l’alza di pesu.

Vegu e so coste innargentate
Ch’ella riccama l’alga nera ;
Vegu e so cità chì di sera
Hanu voci d’innamurate

Vegu e so machje chì l’imbernu
Lascia intatte e sì ne cummove ;
E so canalette e le piove
Chì danu à l’orte un bon guvernu

Vegu achjustrati i so pughjali
Cume cervi in listessa banda
E u ventu pazzu chì cummanda
U focu imfamu è i tempurali.

E vegu l’omi è le zitelle :
A’chì m’impreca, à chì mi ride,
A’chì mi feghja è ùn si decide.
Poi, pensu à ciò chì ci divide.
O corre, inchjoda e to bulelle.

Anton’Francescu Filippini \ Jean-Claude Acquaviva \ Bruno Coulais
A Filetta