Unicorna

Unicorna, fatina
Tù voce chjara di spiscina,
Alta sapienza traculina,
Tù arcu di scienza.
Unicorna, fatina
Tù ch’ùn hai micca cunfina,
Schjarìscemi a strada divina
Di a cunniscenza.

« Ti mustreraghju a vìa
Chì va da sulana à umbrìa,
Tandu da cuscenza à tuntìa
Apri la to mente.
Serà longu u viaghju
Ma saviezza t’ampareraghju,
Per chè tù porti lu messaghju
A chì vole sente. »

Unicorna, fatina
Se qualchì volta la vadina
More luntana di a marina,
N’ùn mi lascià persu.
Unicorna, fatina
Empie a mio mente cantarina
Di a purezza medicina
D’u to universu.

« Ne arme ne fraccassu,
Per chè tù apri lu to chjassu,
Basteranu quadra è cumpassu
Per vince a bughjura. »

Unicorna, fatina
N’ùn sò ciò ch’a vita destina,
Ma se tù mi stai vicina
Quì à fiancu à mè,
Unicorna, fatina
U lume nascerà da tè…