Un soffiu di libertà

Quandi u mare amurosu carezza le to sponde
E chi l’aria s’infiara a l’imbruni di a terra
M’incantanu e staggione chi azzinganu e to stonde
E l’ombra di a pace chi invadisce la sera.

Cume un soffiu di libertà.   Bis

Quandu i venti d’inguernu scappanu a lu meziornu
Nantu a e spiche mature intrecciate in onde d’oru
Vecu ballà una fiara nata in core di ghjornu
E chi in l’ochji di u vecchju luce tale un tesoru.

Cume un soffiu di libertà.   Bis

Quandi u sognu d’oghje si mette in catalettu
Di tutte e schjavitu, di tutte e to ruine
Sentu cantà una voce in fondu di u mio pettu
Chi corre a chjamà l’anima da l’elpe a le marine.

Cume un soffiu di libertà.   Bis

Da le to mosse antiche a l’alba incatenata
Da u fiore chi spunta a l’usciu di e prigione
Viaghja culore di lume a mente rivultata
Di quellu chi ti cerca è ti scopre nazione.
Per u soffiu di libertà. Bis

G.P.Poletti
Canta u populu corsu