1

Un fiori sunnieghja

U Soli dormi, a luna in celu veghja
Accantu à mè un fiori sunnieghja
Un rigalu purtatu da li stelli
Una dea cu la pelli di meli
Dumani cu li to ochji amurosi
Mi darè tanti sguardi diliziosi.

Cum’è lu ventu ch’in li frondi s’invita
In i to capelli a mio manu hè svanita
E viaghja pè culletti è pianuri
Paisaghji di li piu belli fatturi
Dumane cu li to mani amurosi
Mi darè tanti allisci diliziosi

L’alba purterà d’i so splendori
U discetu di li nostri ardori
Milli raghji, milli culori
Stonda eterna di lu nostru amori

U soli dormi, a luna in celu veghja
Accantu à mè un fiori sunnieghja
Mi conta foli u to sirenu visu
Mazzulellu d’amori, paradisu
Dumani cu li to labbri amurosi
Mi darè tanti basgi diliziosi