1

U pranzu

S’o vi pudessi discrive
A stundetta sfughjiticcia
Chi sculisce trà lu scrive
Cum’è scagliola di diccia.

S’o pudessi mette in ballu
L’assestu di le mio rime
Da fà credevi a lu callu
E a sta sporta di susine.

Agrombà la malvasia
Fà spunta li pomidori
Fichi noci è puesia
Tanti fiori pè decori.

E matura per favore
L’uva dolce muscatella
Tirane u so liquore
Empiene lu caratellu.

Offrevvi a taulinu
Tutt’e grazie di u signore
Acqua fresca è bonu vinu
Chjarascinu di culore.

Pone in l’ortu di l’antichi
E grazie di fior’eternu
Annacqualle à puesia
Eppo dalli un bon guernu.

U tianu è a pulenda
I sangui è lu ghjalaticciu
Staggione senza serrenda
Chjarasgi mezu à i ghjicci.

U pane fattu di fiore
Tradui le nostre stese
Cù li piatti u so culore
Cù la cucina Francese.

E paste di la tuscana
Chi s’ugnunu si ne busca
U so piattu per cuccagna
Fisculendu sin’a in Crusca.

D’ogni parte di u mondu
Vene u prufumu raru
Chi passendu sopra l’onde
Met’un gustu dolce amaru.

Eppo in giru a stu pranzu
Chi à mez’à la cuntintezza
La si gode cume nanzu
L’amicizia hè senza vezzi.

La ribombi a nostra lingua
La ribombi a nostra lingua.

Patriziu Croce \ Ghjuvan’Michele Armani
Chjami Aghjalesi