U partigianu

Trà li mughji è li silenzii
Pienti zeppi assuffucati
Si hè pisata la voce
Di li populi nigati.

Liberendu a nazione
Feremu a rivoluzione.

Cù li ghjuchi l’inghjuliati
Operai è paisani
Chi si frustanu la vita
E chi campanu poc’anni.

Liberendu a nazione
Feremu a rivoluzione.

Contr’à Francia imperialista
Manu di li spluttatori
Contr’à i Corsi impanzati
Sempre vili è traditori.

Liberendu a nazione
Feremu a rivoluzione.

Per la terra di u cumunu
Da i nostr’antichi lasciata
Ch’è n’avemu scumpartuta
Eppo oghje abbandunata.

Liberendu a nazione
Feremu a rivoluzione.

Per la libertà di l’omu
Cù li populi fratelli
Contr’à u capitale ingordu
Chi li porta à i macelli.

Liberendu a nazione
Feremu a rivoluzione.

Pè li vechji è pè li zitelli
Da la so lingua ligati
Pè li corsi omi degni
Chi sò stati imprigiunati.

Per la Corsica Nazione  Bis
Feremu a rivoluzione.

Patriziu Croce \ Tradiziunale Ucrania
Chjami Aghjalesi