U Palazzu Verdi

In u palazzu verdi
Se ùn trovi l’aceddi,
Poi infattà un cundannatu stranu :
A so barba hè incasciata,
U fucili hè armatu,
Tali Falcina in a so rialtà.

‘Ssu palazzu abbaglianti,
Trà a vita è a morti,
Hè fruntiera scura pà l’umanità.
Ùn hè micca sguaiata
È mancu dizgraziata,
Antica prova di a dignità.

Cusì ferma l’intesa,
Chì silenziu è attesa
Sò i cumpagni di l’eternità.
Da chì u mondu hè mondu
Da u celu à u prufondu,
Lamentu mutu di a lialtà.

Aldilà di u ventu,
Aldilà di u tempu
Cresci, furiosa, a voglia di campà.
Di petra è di saetta,
D’onori è di vindetta,
Tremenda stà l’ugnula vulintà.

Mathieu Casanova / Michel Tomei