1

Tù Dumenicu

Hommage aux combattants de l’ombre de tous les temps, en lutte contre le nazisme et le révisionisme.

D’ottobre in Zerubia a luna hè cusi bella
E u ventu in furesta viulineghja in li pini
A notte di vaghjime aspetta un’antra stella
Da i Martini à Siò marchjanu i clandestini.
E tù Dumenicu, ribellu di cugnome chi ùn vulia mai dorme.

Cun tè sò ghjunti tutti omi di u prima trinca
I sorba, i Noell è l’altri Ghjacumoni
Quelli di a campagna è quelli di marinca
Chi sunniavanu l’arba mà senza cavizzoni.
E tù Dumenicu, ribellu di cugnome chi ùn vulia mai dorme.

E vostre le vittorie eranu silenziose
A gloria a sai bè, ùn canta chè u ghjornu
Quantu funu i cumpagni di’sse mosse furiose
Chi partianu fieri senza pregà ritornu.
E tù Dumenicu, ribellu di cugnome chi ùn vulia mai dorme.

E oghje senti di chi ogni passatu hè mortu
Chi li fiori s’annoianu nantu à e tombe vechje
Chi hè megliu à un circà quale chi avia tortu
S’imbrutta la memoria in certe bocche techje.
E tù Dumenicu, ribellu di cugnome chi ùn vulia mai dorme.

Oghje nantu à’ssi chjassi pascenu i muntoni
Di quandu in quandu i neri intisgianu i bianchi
Chi diceria avà Giusti è Mondoloni
E tutti i to fratelli cù i so fucili stanchi.
E tù Dumenicu, ribellu di cugnome chi ùn vulia mai dorme.

D’ottobre in Zerubie a luna hè sempre bella
E u ventu in furesta viulineghja in li pini
A notte di vaghjime aspetta un’antra stella
Da i Martini à Siò hai l’ochji clandestini.
E tù Dumenicu, ribellu di cugnome chi ùn vulia mai dorme.

Ghjuvanpaulu Poletti.
Canta u populu corsu