Tù chì campi

Tù chì campi incù un nodu in gola
Chì ti stringhje è chì t’affoga
Chì t’impidisce di parlà
Tù chì campi è ch’ùn poi campà.

Pesale alte isse mani
Inghjuliate da l’affanni
Incù le ghjalle è scorciture
Pesale, pesale pure.

Battiti in omu fieru
Fà valè la to virtù
U to passu sempre sinceru
À la punta ci sì tù.

Ferai la to nazione
Senza statue nè prigioni
U to paese in libertà
U to fiatu si spannerà.

Fà schjattà le to surgente
Ch’elle annacquinu isse terre
Le terre di lu presente
Tù chì campi è ch’ùn poi campà.

Chì le rise di i zitelli
Faccinu sbuccià le granelle
Granelle per l’umanità
Tù chì campi è ch’ùn poi campà.