1

Terra Celta

Longhi l’anni chì si n’era partuta la musa
Viaghjendu per lochi luntani assai
Ma bastò quell’ arietta di caramusa
Per ch’ella volti più bella chè mai
Musica surella di Brittania a Gaella
Un giardinu ch’ùn pianta mai di fiurì
Corsa ferma a mio scelta, ma ti vulia dì
Terra celta maga quante tù sì

Mi ramentu quest’ore, ghjunghjia l’albore
A ricercà meraviglie piattate
M’hà guidatu Merlinu l’incantadore
Per a furesta à u ballu di e fate
Chjerchji di stantari, maestosi altari
A ‘ssi dii antichi chì camponu quì
Corsa ferma a mio scelta, ma ti vulia dì
Terra celta strana quante tù sì

Zilifrina ghjunta d’e culline d’Irlanda
Mi murmucinò millaie di fole
Si strapponu tandu e nebbie sopr’à Brocelianda
Svilendu i fulletti fughjendu u sole
Bevii à a funtana di a fata Morgana
Sete ormai ùn vulerà più finì
Corsa ferma a mio scelta, ma ti vulia dì
Terra celta bella quante tù sì

Temu quelle stonde di lascià le to sponde
Pena chì si sola à pudè guarrì
Corsa ferma a mio scelta, ma ti vulia dì
Terra celta cara quante tù sì