Sunnieghju Di Tè

Farandola di note parechje,
Nanna per lu t’ansciu insunnulitu
Chì mi sussura pianu à l’arechje
Mille sponde d’un viaghju infinitu.

Ripigliu:
Zitella
Stasera sunnieghju di tè,
Zitella
Stasera eiu dormu cun tè.

Un’odore chì si piatta leggera,
Un purtellu apertu versu Aprile,
Una manu carezzante è sincera
Cume un raggiu di sole veranile.

Hà furatu l’acquata a to pella,
Ancu più chì u fiore chi s’apre,
A notte hà fattu di qualchì stella
Tanti basgi cascati à le to lapre.

Questa notte ci feremu cugliera
Di lu fruttu maturu di l’amore,
Lu mondu sparteremu stasera,
Uniti in lu stessu batticore.