Suldatu

Si chjina à u to latu
U ghjornu chi si more
Lascendu fughje l’ore
Di u tempu scurdatu
Addiu à tè suldatu
Tù chi desti di core
U to ultimu fiatu

Suspira adduluritu
U marmaru turmentu
Lacrimeghja u ventu
Da a notte insischitu
Annant’à u granitu
Trè parolle d’argentu
U to nome hè sculpitu

Sbucina l’orizonte
Una striscia di fume
L’onda chieta di u fiume
Dorme sott’à u ponte
Accarezza u monte
Tandu un dolce lume
U sole alza a fronte

Sparghje l’alba ligera
U so più dolce mantu
L’aria in campusantu
Da l’ombra hè prighjunera
Anima pure è fiera
Ti sia u mio cantu
Una dolce prighera

Anima pure è fiera
Ti sia u mio cantu
Una dolce prighera