Spera

I nostri fiumi cari sò ghjunti da li monti
Gonfii di tempurali à parà si li ponti
E l’onda cantarina à fiumara rabbiosa
Falendu une matina s’hà purtatu ogni cosa

E loche tralasciate si sò inlamaghjunite
E surghjente siccate, e chjame sò finite
È toccu l’estatina trà sicchie è vintere
Si ne vanu in pulvina, à mezu à e fuchere

Sentu trimà u core di a Terra
Qualcosa chì si more è m’addispera

Sò vistute di dolu è pienghjenu ste mamme
L’anu tombu un figliolu è toltu mille brame
È si ne stanu mute, ùn sanu più parlà
E pene troppu acute, nimu e pò stancià

Sentu trimà u core di a Terra
Qualcosa chì si more è m’addispera

Ma sò tanti fratelli è tanti omi di morsu
È i nostri zitelli anu in bocca u Corsu
Dumane si ferà una più bella storia
L’avvene canterà una nova vittoria

Sentu trimà u core di a Terra
Qualcosa ch’ùn vole more, una lumera
Chì ci schjarisce l’ore cum’è una spera x2