Sogni Zitellacci

Un ci n’era battelli cù le vele imbuffate
Da visità ù mondu o girà lu Terraniu
E mi facia in capu è mio girandulate
Ma turnai cù mè più d’un ricordu stranu.

A notte s’o ci pensu o sia puru in sonniu
Mi vene st’armunia è sti dolci parfumi
I balli infiarati per un vechju demoniu
E la notte s’accende di millaie di lumi.

Una donna chi balla era forse una dea
Accorta u mio fiatu è quellu di a folla
L’oriente carezza è ne sera la mea
Sta manu chi si stringhje è stu sangue chi bolle ?

A sciabula chi pende à lu mio currighjolu
Mi batte nant’à l’anche è luce sott’a luna
A mi dete un guerrieru ch’ùn avia figliolu
E chi sentendu l’ora disse « bona furtuna » .

Tandu si chi l’avia a puesia in capu
Puesia di luna svapurata à lu sole
Un ferma dighjà nunda di stu tempu beatu
E i ghjorni à stu mondu paren’anchelli fole. Bis