1

Sete

N’aghju vistu scalà
Caravelle è vascelli
A’bandere sprigate
N’aghju vistu arrizzà
Citadelle cun torre
Longu à e rive amate
Di i mei ci sò chì anu dettu di nò
A’putere d’altrò quandu impunia legge

Da chì mare mi circonda
Cresce sete à a mo sponda
Sete meia più prufonda
Quale ti ferà stancià

Mi ricordu d’avè
Vistu un fiore sbucciatu
Spanassi à u mo lume
U s’hà coltu lu rè
Fior di maghju arrubatu
E’lampatu in un fiume
Di i mei ci sò chì anu dettu di nò
A’putere d’altrò quandu impunia legge

Da chì mare mi circonda
Cresce sete à a mo sponda
Sete meia più prufonda
Quale ti ferà stancià

Bramu sempre di fà
Di mo casa cimata
Casa addiletta ghjente
Di mo stesa di terra
Allungata di mare
Un giardinu ridente
Di i mei ci sò chì dicenu di nò
A’putere d’altrò quandu m’impone legge

Da chì mare mi circonda Bis
Cresce sete à a mo sponda
Sete meia più prufonda
Quale ti ferà stancià

Sete meia più prufonda
Quale ti ferà stancià

G.T. Rocchi \ F. Travaglini
Felì