Se

Se dumane sai tene curraggiu è fede
Quandu in giru à tè ognunu i perderà,
Mezu à l’avversità se in tè sai crede,
Amparendu sempre più à dubità.

Se i sonnii ùn ti piattenu realità,
Se tù sai pensà, ma agisce dinù,
E se tù scontri trionfu è calamità
Sò dui impustori, ùn valenu di più.

Se poi suppurtà di sente e to parolle
Da un scemu pè ingannà d’altri scemi,
Se custruì cù le to mani sole
La to vita chì casca, n’ùn temi.

Se tù poi perde l’oru di centu scummesse
D’un colpu, cusì, senza suspiru vanu,
Se tù sai amparà i sicreti di l’esse
Senza mai diventà viulente o tiranu.

Se poi furzà u to corpu, u to core
A serve cume vita à mantene,
Quand’ùn ci serà ch’issa fiara chì more
A vulintà di dì « Ci vole à tene ».

Se raggioni e folle senza perde ciarbellu
Fermi umile cunsigliendu i rè,
Se lu t’amicu li chjami Fratellu
Senza ch’ellu sia tuttu per tè.

Tandu li rè è li dii, furtuna è vittoria
Ti seranu schjavi sottumessi à l’ormai,
Ma ciò chì vale assai più ch’i rè è a gloria,
O figliolu caru, tandu omu serai.