Scrittori

A notte sorge per sfiurà a to scrittura
È à lucendiluna cù l’estru vagabondu
A to piuma lesta custruisce un mondu
In l’andatu paisanu di a vechja cultura

Sempre porti a to petra à l’edifiziu
Sintinella fiera d’esse di issu paese
U versu indomitu eppò e mani tese
Conti una storia spruvista d’artifiziu

Pueta di dumane, d’oghje è di prima
Ti vogliu ringrazià è dì ti la mio stima
Inalzà ogni mente versu l’alta cima
Chì porti u to core in punta di rima

Ricusi ogni gabbia di legge inghjusta
Sempre arrittu è prontu à difende
L’anima altiera chì mai ùn s’arrende
Manteni accesa a più nobile brusta

Umile, presente di pettu à u timore
Lasciendu a to mente corre à briglia sciolta
Scrivi a lettera d’oru, a pace è a rivolta
È per l’eternità a to rima mai ùn more

Pueta di dumane, d’oghje è di prima
Ti vogliu ringrazià è dì ti la mio stima
Inalzà ogni mente versu l’alta cima
Chì porti u to core in punta di rima

Pueta di dumane, d’oghje è di prima
Ti vogliu ringrazià è dì ti la mio stima
Inalzà ogni mente versu l’alta cima
Chì porti u to core in punta di rima

G.F. Terrazzoni
F. Santucci