Scalanu

Ghjunghjenu trenta vascelli
A quattru file d’archere
Da li poghi à le custere
S’accoglienu li zitelli
E donne è li vechjaconi
Cun le misge è li piloni
Ghjunghjenu trenta vascelli.

Pianu sguilla lu marinu
Lindu è dolce cum’è mele
E ne sò piene le vele
Da li pasciali avvincinu
Ne fala tamanta frombu
Sona à più pudè culombu
Pianu sguillà lu marinu.

Avà rughjani cannoni
Annant’à li bastimenti
Si sentenu ghjuramenti
Commandi, urli è brioni
Collanu da sottu à foce
Ci sò chi facenu e voce
Avà rughjani cannoni.

In li vecchji campanili
Tintinneghja u battifocu
Omi n’affacca in ogni locu
Cun carchera è cun fucili
Lampati nant’à l’armone
Pienghjuleghjanu e ciccone
In li vecchji campanili.

Petru Rocca
Canta u populu corsu