Puesia

A l’orizonti infiarati
Da l’accèndita crudelli
Lagni brioni è scumpienti
Tòmbani tanti fratelli.

Sighjuzeghjani i populi
Nant’a tarra sanguinosa
Piègnani qualchi suredda
Un figliolu, una sposa.

Puesia rinfresca l’aria
Di issi lochi ghjastimati.

Rimori di i stacchetti
Chi ven’à pistà u chjassu
Ind’un passu militaru
Fàcini tantu fracassu.

S’avicina a scarpata
Sò centu sò deci milla
Spavintèghjani issi lochi
Ghjugni a guardia civila.

Puesia rinfresca l’aria
Di issi lochi ghjastimati.

È tremani di paura
Ind’i carciari aguastati
I ziteddi miseriosi
Ind’i so panni stracciati.

Casticati di natura,
Eterni persecutati,
A so unica scelta :
Sottumissi o ammazzatti.

Puesia rinfresca l’aria
Di issi lochi ghjastimati.

Puesia.